ERICK TIKAM MULUT

Tadi sore (8/6) sekitar jam 15.00, Erick deng dia pung kawan dong rame-rame pulang dari skola di SMAN 1 Kalabahi pake speda motor. Baptua bawa dia pung motor andalan Suzuki smash gonceng dia pung sobat satu. Ketika tiba di muka bengkel dekat gereja Syaloom-Sawah lama ada satu bemo yang barenti kasturun penumpang di dong pung muka. Waktu dong melambung mau lewat takuju sa satu ekor anjing lari potong jalan. Itu anjing ( menurut Erick pung carita ) lari tabrak sang dong. Karena takuju deng kaget maka baptua dong taguling dan taroso di aspal sekitar sat meter. Erick pung tangan kanan taparuk di siku deng di pergelangan. Bukan itu sa, di pinggang ( di kolor pung batas ) juga sempat taparuk.
Dia pung motor pung batok kapala ancor. Setelah kecelakaan itu dia ditolong oleh dia pung kawan pung mama, yang pegang bao sang dia pi maituapung rumah ko langsung tatobi deng aer panas lalu kasih basa itu taparuk dong dengan minyak ular. Menurut mamtua itu minyak jitu untuk luka-luka yang model bagini, cuma Erick bilang dia bau amis ( ko ular pung minyak na ).
Terhadap peristiwa ini Erick pung mama ( Mama Yos ) marah-marah dan nyaris klap sang dia, ontong dia cepat-cepat fafudi maitua ko dingin. Sedangkan baptua pung komentar sadiki sa : ” Karmana anjing bisa kasi raroso satu ana muda di aspal lalu gonggong sang dong. Kalo kana beta itu anjing su jadi RW ”. Ketika berita ini diposting Erick sedang nonton TV.