Tabê ma pules neu ko msâ, Amâ Takoy!

Pules ma seunbanit namfau neu Uisneno Amanekat ma Amnaut fun In nok kit ma nfé kit monit tala oras i. Mlilê ‘naek naheun au nekak nbi oras ho surat eletronik (e-mail) nemantean kau. Me toit maäf fun au ka utae fa laba, nane fun mepu ma seni humâ-humâ. Me nbi neno i mauthe au ‘lút ufanî ho hanam nâko pah ma bale Alor.

‘Tebes ma maneö hit es apaot-apanat neu hit uab-molok ma ‘maus ok-okê lê hit beï ma naï nabalab nani neu kit henait oke-te hit, batan neno i, tatutan tafanî neu batan amnemat. Tani ma futus i musti kaisâ natfék. Au umlilê (‘malín) fun ho mutéf blog nane ma mtae (mbaca) in nesan, ma nneis nâko nane mûnoinâ ho anmone manekat, Ignasius (kanaf amasat!), he nahín hit uab amasat i. Blog nane au ‘moë he uteab hit uab amasat neu pah-pinan nfunamnatéf. Tafnekan he blog nane nfain-on nete-lalan henait atoni namfau nbi hit kuan ma bale bian nahín hiti ‘maus kultural lê musti mapanat piuta.

Naï Rasi in uab ma in rasi nane hiti msâ. Au ‘mairini ‘maet fun in mapanat piuta masi ho mutua ek bare ma pah bian. Hit musti tahínje rek-reko ma troim he atoni bian nahínje msâ. Karu ka hit, sekau ntein?Neis-neis neu hit atoin’askorat; musti tfé ranan arekot.

Mauthe au utón ko kleö ntomneu au ‘poik. Au amâ, Josep Manhitu, guru SD, nâko Noemuti, TTU (es onnane au musti uhín Uab Metô logat Noemuti ma TTU ini), au einâ, Rosalina Tunliu, ahonit-apanat, nâko kuan Sunu, Amanatun Selatan (neu au musti uhín Uab Metô logat Amanatun ma TTS ini), au ûnae ‘bi pah Oekusi-Ambenu, fun un-unû au amâ nanaob in mepu nbi nae, me nbi oras i nmeup natua nok au einâ es Noemuti (neu au musti uhín Uab Metô logat Oekusi-Ambeno ma Tetun). Namuin au ‘kulia ‘bi Undana (ma babaun ûnoinâ he uhín Uab Metô logat Amarasi). Neno i au fê ûnoinâ he uhín Uab Metô logat Kusâ-Manleâ, lê mapakê es pah Belu. Es onnane, au ‘malín he uüab hit uab masi oras i au utua es Yogyakarta (± ton 10-en) ma musti ûnoin’ok he uhín uab negara bian sini (Inglés, Prancis, Spanyol, Portugés, Esperanto, Italia, ma bian-bian).

Nbi oras i au fê aim loit he upoin/’publikasi (‘terbitkan) au antologi/koleksi puisi Uab Metô es. Mtulun kau meik onen henait salit/rencana i njail natuin lomit alekot he tpanat hit uab. Koleksi puisi i ok-okê (buku mesê) matuï neik Uab Metô. Hit uabe musti matuï henait batan/generasi amunit nânoinâ ma nmuî sinmakat he npanat. Hit tahín, uab lê ka nmuî fa sastra tuis (sastra tulis) lof ka mapanat fa lekleok, fun sâ-sâ le matuï lof nabala kun. Me sâ-sâ le mauabâ me ka matüi lof nabeî namneuk nunfín kun.

Amunit i nfain-on hantonas mesê, ka promosi fa….hehehe. Kalu mloim he mûnoinâ uab Tetun (Timor-Leste ini), nabeî maim he msós Kamus Indonesia-Tetun # Tetun-Indonesia. Kamus i au es a-‘tui ma nabeî mupeinî es Toko Gramedia Kupang. Tulun he muteab kau hantonas i neu amnemat-sin nâko Timor-Leste lê natuan es kota Kalabahi.

Tulun he muteab au salam neu ho fé ma anmone manekat msâ neu atuinas “Persehatian Orang Timor” sin ok-okê. Au ufnekan henait nekmesê-ansaomesê amasat nane nmoin piuta ma nfút namepan ki ok-okê mbi pah Alor.

Au lasi nheu ma ntu neuba i. Makasi. Imanuel, Uisneno he nok kit piuta.

Tabê,

John

Mkios ma mbaca au blog-sin es:

http://ymanhitu.blogspot.com
http://uabmeto.blogspot.com